د افغانستان د اسلامي جمهوریت د اطلاعاتو او فرهنګ وزارت د مالي، اداري او توریزم مرستیالې مژګان مصطفوي او په نوي ډیلي کې د افغانستان د اسلامي جمهوریت لوی سفارت فرهنګي اتشې اجمل عالمزي د روان کال د مرغومې په ۸ مه نېټه د(Self-Employed Women's Association) له مسولې، منجو چوپړا سره د افغانستان سفارت په مقر کې وکتل.

د دې ناستې په ترڅ کې دواړو پلاوو په افغانستان کې د فرهنګي توریزم صنعت د پراختیا اړوندو خپرونو په اړه خبرې اترې وکړې.

د ناستې په ترڅ کې داسې هوډ وشو تر څو د افغانستان سفارت د فرهنګي اتشې د دفتر او په حمید آباد کې د SEWA مرکزي دفتر تر مینځ دواملرونکې اړیکې رامینځ ته شي تر څو په دې توګه په هند کې د افغان مېشتو ښځو د پیاوړتیا اړوندې خپرونې تر لاس لاندې ونیول شي.

په دې ناسته کې همداراز له اجمل عالمزي څخه غوښتنه وشوه تر څو په نږدې راتلونکي کې د نوي ډيلي په کنات پلېس سیمه او ګجرات کې  د SEWA له سیمه ایزو دفترونو څخه کتنه وکړي.

د یادونې وړ ده چې SEWA په تېره یوه لسیزه کې د افغان ښځو د پیاوړتیا لپاره بېلابېلې خپرونې په لار اچولې او پلې کړي دي. همدا اوس د رهبرۍ او توریزم فرهنګ او میراثونو په برخه کې د ښځو د پیاوړتیا تر نوم لاندې دPromote USAID پروژه چې د دوو میلیونو ډالرو په ارزښت ده، په افغانستان کې فعالیت کوي. 

په نوي ډيلي کې د افغانستان اسلامي جمهوریت لوی سفیر ډاکټر شیدا محمد ابدالي، د روان کال د دسمبر په ۱۹ مه نېټه په هند کې د پولنډ سفیر او د افغانستان لپاره د پولنډ نامقیم سفیر ادم براکوسکي (Adam Burakowski) سره په خپل کاري دفتر کې وکتل.

په پیل کې د افغانستان سفیر د پولنډ سفیر ته په ښه راغلاست ویلو سره د ده د نوي ماموریت لپاره نېکې هیلې څرګندې کړې.  

دواړو پلاوو د ناستې په ترڅ کې د افغانستان او پولنډ تر مینځ د دوه اړخیزه اړیکو او د دې اړیکو د لا پیاوړتیا او پراختیا د لارو موندلو په اړه خبرې اترې وکړې.

په افغانستان او سیمه کې امنیتي ستونزو ته په اشارې سره، ډاکټر ابدالي د تروریزم د حمایتګرو ډلو په اړه اندېښنه څرګنده کړه او د تروریزم په وړاندې د سیمې هېوادونو د مخلصانه مبارزې پر اړتیا یې ټینګار وکړ.

په دې ناسته کې په هند کې د پولنډ سفیر له افغان ولس مشر سره د خپل ژمنلیک د وړانډې کولو په موخه د لیدلو په برخه کې د افغانستان سفارت مرسته وغوښته.

په پای کې دواړو پلاوو د پولنډ او افغانستان تر مینځ د اړیکو د لا پیاوړتیا په اړه او دا چې څخه ډول کولی شي دا اړیکې لا پراخې شي خبرې اترې وکړې. 

په نوي ډیلي کې د افغانستان د اسلامي جمهوریت لوی سفارت د روان کال د لیندۍ میاشتې په ۲۷ مه نېټه د سویلي اسیا ټکوانډو فستیوال مډال راوړونکي په ستاینلیکونو ونازول.

د افغانستان د ټکوانډو ۴۰ غړو د سویلي اسیا  ټکوانډو په فسټیوال کې چې د اتراکهند ایالت به دهرادون ښار کې جوړ شوی وو، وتوانېدل چې د ۲۴ سرو زرو، ۱۲ سپینو زرو او ۴ برونز مډالونو په لاسته راوړلو سره د سیالۍ دویم مقام لاس ته راوړي. په دې سیالیو کې سربېره پر افغانستان، د هند، نیپال، بنګله دېش او مالیزیا هېوادونو هم ګډون کړی وو.

په نوي ډيلي کې د افغانستان لوی سفیر ډاکټر شیدا محمد ابدالی په هغه غونډه کې چې په همدې موخه جوړه شوې وه وینا وکړه او ویې ویل: "موږ له ۲۰۰۱ کال څخه راپدېخوا د سپورټ په ډګر کې د عالي لاسته راوړنو شاهدان اوسېدلي یو، دا هغه څه دې چې نړۍ یې له موږ څخه توقع نه درلوده. دا زموږ لپاره د ویاړ خبره ده چې زموږ ځوان ورزشکاران هر ځل له بریالیتوب سره راګرځي او هر ځل د یو بل ویاړ لامل ګرځي."

د غونډې په پای کې افغان سفیر او یو شمېر ډیپلوماټانو د ټکوانډو مډال راوړونکي په ستاینلیکونو ونازول.

په نوي ډیلي کې د افغانستان اسلامي جمهوریت لوی سفارت د افغانستان د ځوانانو پارلمان غړي د روان زېږدیز کال د دسمبر په ۱۵ مه نېټه په ستاینلیکونو ونازول.

په نوي ډيلي کې د افغانستان لوی سفیر ډاکټر شیدا محمد ابدالي د خپلې وینا په ترڅ کې د افغانستان د ځوانانو پارلمان غړي په  "سولې لپاره د نړیوالو ځوانانو کنفرانس -۲۰۱۷" کې د بریالیتوب د ترلاسه کولو په موخه وستایل. د افغانستان سفیر همداراز ځوانان په هېواد کې د سولې او یووالي په لور د کار کولو لپاره وهڅول او زیاته یې کړه: "افغانستان له هند سره د هغو هېوادونو له ډلې څخه یو وو چې د تاوتریخوالي ضد مبارزه یې پیل کړه او دا د ځوان نسل مسولیت دی تر څو د خپلو پلرونو ګامونه تعقیب کړي."

ډاکټر ابدالي همداراز د هند او افغانستان تر مینځ پخوانیو او تاریخي فرهنګي اړیکو ته په اشارې سره وویل: "د هند په ګوټ ګوټ کې تاریخي اثار او بناوې د دواړو هېوادونو د فرهنګي اړیکو ژورتیا  ښيي."

د دې غونډې په ترڅ کې د افغانستان د ځوانانو معین ډاکټر کمال سادات په نوي ډیلي کې د افغانستان له سفارت څخه د "سولې لپاره د نړیوالو ځوانانو کنفرانس -۲۰۱۷" کې د همکارۍ لپاره مننه وکړه او په راتلونکي کې یې د ورته خپرونو په جوړولو کې د سفارت د همکارۍ غوښتنه وکړه.

د افغانستان پارلمان غړي د افغانستان سفیر او ډیپلوماتانو له لوري په ستاینلیکونو ونازول شول.

د افغانستان پارلمان غړي څو ورځې د مخه د سولې لپاره د ځوانانو په نړیوال کنفرانس – ۲۰۱۷ کې د ګډون لپاره نوي ډيلي ته راغلي وو. دا کنفرانس د افغانستان د ځوانانو پارلمان، India Foundation، د افغانستان د ځوانانو معینیت او د ملګرو ملتونو د ځوانانو سازمان له لوري په نوي ډیلي کې د افغانستان د اسلامي جمهوریت لوی سفارت په همکارۍ سره جوړ شوی وو. په دې کنفرانس کې د نړۍ له ۵۰ هېوادونو څخه ځوانانو ګډون کړی وو.

په هند کې د افغانستان اسلامي جمهوریت لوی سفیر ډاکټر شیدا محمد ابدالي د روان کال د دسمبر میاشتې په ۱۳ مه نېټه د "سولې لپاره د ځوانانو نړیوال کنفرانس-۲۰۱۷"  کې چې په نهرو موزیم او کتابتون کې جوړ شوی وو، وینا وکړه.

دا کنفرانس د افغانستان د ځوانانو کال د لمانځلو په موخه د افغانستان ځوانانو پارلمان، هند بنسټ (India Foundation)، د افغانستان د ځوانانو معنییت، د ځوانانو لپاره د ملګرو ملتونو نمایندګۍ او نهرو موزیم او کتابتون له خوا په نوي ډیلي کې د افغانستان د اسلامي جمهوریت د لوی سفارت په نږدې همکارۍ سره جوړ شوی وو.

په دې کنفرانس کې په بهرنو چارو کې د دولت وزیر ام.جې. اکبر، د هند د ځوانانو او سپورټ وزیر راجیاوردن سینګ راټور او د افغانستان د ځوانانو معین ډاکټر کمال سادات د مېلمو له ډلې څخه وو. همداراز په دې کنفرانس کې له ۵۰ هېوادونو څخه ځوانانو ګډون کړی وو.

د افغانستان سفیر د خپلې وینا په ترڅ کې د افغانستان حکومت له نوښت څخه مننه وکړه او همداراز یې د ځوانانو پارلمان هلې ځلې وستایلې او زیاته یې کړه چې دا ډول کنفرانسونه د ځوانانو ترمینځ د زده کړې روحیه راپاروي او له یو بل سره د اړیکو د لا پیاوړتیا په موخه د ښو فرصتونو د رامینځ ته کېدو لامل کېږي.

د دې کنفرانس په ترڅ کې په بهرنیو چارو کې د دولت وزیر ام. جې. اکبر د دې کنفرانس د اجندا عنوان ته چې په سوله ټینګار کوي اشاره وکړه او زیاته یې کړه: "دا په روښانه توګه په ډاګه کوي چې  افغان ځوانان د سولې تږي دي او دا همداراز ښيي چې افغان ځوانان په خپل هېواد او سیمه کې د سولې او ثبات د راوستلو لپاره په کلکه کار کوي." ښاغلي اکبر همداراز د افغان ځوانانو له دې او ورته نورو نوښتونو څخه د هند حکومت ملاتړ اعلان کړ تر څو افغان ځوانان وکولی شي خپل غږ لا اوچت کړي.

د دې کنفرانس په ترڅ کې افغان ولسمشر محمد اشرف غني ته د افغان ځوانانو څخه د ملاتړ په موخه مډال ورکړل شو چې د ولس مشر د پروټوکول مشر مختار الله مختار له لوري د ولس مشر په استازیتوب ترلاسه شو.

په پای کې د ګډونوالو له ډلې څخه یو شمېر ځوانو رهبرانو ته د کال په لړ کې د دوی د لاس ته راوړنو پر بنسټ ستاینلیکونه ورکړل شول.

دا کنفرانس د افغانستان سفارت د لومړي سکرټر حامد تهذیب په اختتامیه وینا څخه پای ته ورسېد.

سږ کال،  د افغانستان ځوانانو پارلمان په پرانیستلو سره د ځوانانو په نوم ونومول شو تر څو ځوانان د هېواد په پرمختګ کې برخه واخلي او همداراز په هېواد کې د سولې، ثبات او ورورولۍ د رامینځ ته کېدو لامل شي.