په نوي ډیلي کې د افغانستان د اسلامی جمهوریت لوی سفیر ډاکټر شیدا محمد ابدالي د روان کال د جنوري میاشتې په ۲۴ مه نېټه په هند کې د منګولیا سفیر ګنچیګ ګنبولد (Gonchig Ganbold) سره په خپل کاري دفتر کې وکتل.

 د دوه اړخیزه اړیکو په اړه د خبرو اترو سربېره، د دې ناستې موخه په نوي ډیلي کې د افغانستان سفارت څخه د همکارۍ غوښتنه وه، تر څو د افغانستان د حکومت له خوا د پرمختګ په لور وچه کې راګیر هېوادونو (Landlocked Developing Countries) لپاره د فکر نړیوالې خونې (International Think Tank) د مشرانو بورد لپاره استازی معرفي کړل شي.  

په پیل کې دواړو پلاوو د منګولیا او افغانستان د دوه اړخیزه اړیکو په اړه خبرې وکړې. ډاکټر ابدالي د دواړو هېوادونو تر مینځ تاریخي اړیکو او فرهنګي مشترکاتو ته په اشارې سره زیاته کړه چې د دې مشترکاتو له ډلې څخه یې یو حقیقت دا هم دی چې دواړه هېوادونه په وچه کې راګیر دي.  

د دې ناستې په ترڅ کې د منګولیا سفیر د افغانستان سفیر ته د پرمختګ په لور وچه کې راګیر هېوادونو (Landlocked Developing Countries) لپاره د فکر نړیوالې خونې (International Think Tank) د فعالیتونو په اړه مالومات وړاندې کړل. دا بنسټ د ترانزیت ترانسپورت اړوند همکاریو په اړه په وچه کې راګیر او ترانزیت هېوادونو او د مالي او پرمختیايي نړیوال بنسټونو په کنفرانس کې چې په ۲۰۰۳ کال کې د قراقستان په الماتي ښار کې جوړ شوی وو، رامینځ ته شو.

د پرمختګ په لور وچه کې راګیر هېوادونو (Landlocked Developing Countries) لپاره د فکر نړیوالې خونې (International Think Tank) موخه په وچه کې راګیر هېوادونو تر مینځ د همکارۍ او اړیکو پیاوړي کول دي.

د منګولیا سفیر د ناستې په ترڅ کې له افغان سفارت څخه وغوښتل تر څو د افغانستان حکومت له خوا د دې بنسټ لپاره د استازي په معرفي کولو کې مرسته او همکاري وکړي.

ډاکټر ابدالي د افغانستان له حکومت سره د دوی د غوښتنې او پیغام د شریکولو په برخه کې د پوره همکارۍ ژمنه وکړه.

د یادونې وړ ده چې په دې ناسته کې د افغانستان سفارت لومړي سکرتر، حامد تهذیب هم ګډون کړی وو.

په نوي ډیلي کې د افغانستان د اسلامي جمهوریت لوی سفیر ډاکټر شیدا محمد ابدالي د روان کال د جنوري په ۲۲ مه نېټه د "ښځې د افغان ښځو لپاره" بنسټ له استازو سره په خپل کاري دفتر کې وکتل.

د دې ناستې موخه د افغانستان سفیر ته په افغانستان او له افغانستان څخه بهر د "ښځې د افغان ښځو لپاره" دفتر په اړه د مالوماتو ورکول او همداراز په نوي ډیلي کې له افغان سفارت څخه د مرستې غوښتل وو تر څو له هغو افغان ښځو سره اړیکې ټینګې کړي چې په هند کې د مهاجرو په توګه اوسېږي. 

په پیل کې د  "ښځې د افغان ښځو لپاره" دفتر مشرې منیژه نادري د افغانستان سفیر ته د دې دفتر د موخو او لیدلورو په اړه مالومات وړاندې کړل. دا دفتر په افغانستان او امریکه کې د محرومو افغان ښځو د حقونو د خوندیتوب تر څنګ ښځو ته د دوی د حقونو په اړه مالومات ورکوي او د تاوتریخوالي د له مینځه وړلو لپاره کار کوي.

د دې ناستې په ترڅ کې د "ښځې د افغان ښځو لپاره" دفتر استازو په نوي ډیلي کې د افغانستان له سفارت څخه وغوښتل تر څو له دوی سره مرسته وشي چې په نوي ډیلي کې له افغان ښځینه مهاجرو سره اړیکې ټینګې کړي او د دوی د لومړنیو اړتیاوو په اړه سروې ترسره کړي.

د دې دفتر استازو ته په ښه راغلاست ویلو سره د افغانستان سفیر د دې دفتر موخې او فعالیتونه چې د افغان ښځو په ژوند کې د مثبت بدلون د رامینځ ته کېدو لامل کېږي وستایل او زیاته یې کړه: "موږ تل د ورته خوځښتونو او فعالیتونو چې په پایله کې یې د افغان ښځو په ژوند کې ښه بدلون راځي ملاتړ کړی او کوو."

ډاکټر ابدالي همداراز د نوموړي دفتر له استازو سره په نوي ډیلي کې د افغانستان سفارت پوره ملاتړ او مرستې ژمنه وکړه او له دوی څخه یې وغوښتل تر څو خپلې غوښتنې په رسمي توګه له سفارت سره ګډې کړي.

د یادونې وړ ده چې "ښځې د افغان ښځو لپاره" بنسټ په ۲۰۰۱ کال کې د امریکې د متحده ایالاتو په نیویارک ښار کې جوړ شوی او موخه یې د داسې نړۍ رامینځ ته کول دي چېرې چې ښځې او نجوني وکولی شي له سوله ایزې فضا څخه لذت یوسي او د ژوند په هر ډګر کې د نارینه وو سره اوږه په اوږه ټولنې ته د خدمت جوګه شي.

 

 

د افغانستان د اسلامی جمهوریت لوی سفیر ډاکټر شیدا محمد ابدالي د جمو کشمیر د لویې وزیرې، محبوبه مفتی سعید په بلنه د ګلمارګ واورې په فسټیوال کې چې د روان کال د جنورۍ میاشتې له ۱۲ څخه تر ۱۴ پورې د کشمیر په ګلمارګ کې جوړ شوی وو، ګډون وکړ.

د دې دری ورځني فسټیوال موخه په کشمیر کې د سیاحت مروجول او همداراز د لا ډېرو سیلانیانو راجلبول وو. د دې فسټیوال په ترڅ کې د واورو اړوندو تفریحي فعالیتونو لکه د واورو سایکل چلولو، په ټیوب ښویېدلو او داسې نورو سربېره د کشمیر سیمه ایز خواړه هم په ننداره اېښودل شوي وو.

د فسټیوال په ترڅ کې، افغان سفیر د یو شمېر سیلانیانو سره د خبرو په لړ کې د افغانستان او کشمیر تر مینځ د ژورو او پخوانیو تاریخي او فرهنګي اړیکو په اړه څرګندونې وکړې او زیاته یې کړه: "په کشمیر کې د افغانانو لوی نفوس د افغانستان او کشمیر تر مینځ د زرکلونو تاریخي او فرهنګي اړیکو استازیتوب کوي او له دې امله د دواړو هېوادونو د خلکو تر مینځ اړیکې په اوسنیو شرایطو کې د هند او افغانستان د ستراتیژیکو اړیکو د لاپیاوړتیا لامل کېږي."

د دي فسټیوال په ترڅ کې د کشمیر سیاحت وزیر تصدق مفتی، د لوی وزیر سلاکار پروفیسور امیتاب ماتو، په پارلمان کې د ګلمارګ استازي محمد عباس واني، د هند بدلون لپاره د ملي قانون ادارې مشر امیتاب کانت، نامتو لیکوال او د انګلستان د پارلمان غړي، لارډ میګناد دیسای، فلم جوړونکي امتیاز علي، لیکوال رکشاندا جلیل او له بېلابېلو نورو ډګرونو څخه شخصیتونو ګډون کړی وو.

د دې فسټیوال تر څنګ، ډاکټر ابدالي کشمیر ته د خپل سفر په ترڅ کې د کشمیر د سیاحت وزیر تصدق مفتي سره وکتل. د دې ناستې په لړ کې دواړو پلاوو د افغانستان او کشمیر د ژورو تاریخي اړیکو او ګډ فرهنګ په اړه خبرې اترې وکړې.

 

په نوي ډیلي کې د افغانستان د اسلامي جمهوریت لوی سفیر ډاکټر شیدا محمد ابدالي د روان کال د جنوري میاشتې په ۱۶ مه نېټه د نیپال د بهرنیو چارو له وزیر، شنکر داس بیراګی سره په نوي ډیلي کې د نیپال په سفارت کې وکتل.

د دې ناستې موخه د دواړو پلاوو له لوري د نیپال او افغانستان تر مینځ د دوه اړخیزه اړیکو او په سیمه کې د امنیتي ستونزو په اړه خبرې کول او همداراز د نیپال او افغانستان وګړو ته د اړوندو قُنسولي چارو په اړه بحث کول وو.

په پیل کې دواړو پلاوو د نیپال او افغانستان د دوه اړخیزه اړیکو او دا چې څه ډول دا اړیکې لا پیاوړې کېدی شي، خبرې او اترې وکړې. د دواړو هېوادونو ترمینځ د دیپلوماتیکو اړیکو د لا پراختیا او پیاوړتیا په موخه د نیپال د بهرنیو چارو وزیر وړاندیز وکړ تر څو د دواړو هېوادونو له لوري افتخاري قُنسولان وپېژندل شي.

د نیپال د بهرنیو چارو وزیر همداراز په افغانستان کې د نیپالي بندیانو په اړه اندېښنه څرګنده کړه او د دواړو هېوادونو تر مینځ د دوستانه اړیکو په نظر کې نیولو سره یې د افغانستان له سفارت څخه وغوښتل چې د افغانستان له حکومت څخه غوښتنه وکړي تر څو دا بندیان خوشې کړل شي.

د افغانستان سفیر، په داسي حال کي چې د افغان وګړو لپاره د نیپال د "رسیدو پر مهال ویزې" خدمتونه چې ډېر ژر به پیل شي وستایل، د نیپال د بهرنیو چارو وزیر ته یې اطمینان ورکړ چې د نیپالي بندیانو اړوند پیغام به د افغانستان له حکومت سره شریک کړي.

دواړو پلاوو د سارک فعالیتونو، په سیمه کې د اوسنیو امنیتي ستونزو او له تروریزم سره د مبارزې په اړه هم خبرې اترې وکړې.

د یادونې وړ ده چې په دې ناسته کې د افغانستان سفارت لومړۍ سکرتر حامد تهذیب هم ګډون کړی وو.

 

د افغانستان د اسلامي جمهوریت لوی سفیر ډاکټر شیدا محمد ابدالي د ۲۰۱۷ کال د دسمبر میاشتې له ۳۰ مې ڼېټې څخه د روان ۲۰۱۸ کال د جنوري تر لومړۍ نېتې پورې د بهوپال ښار له ، Sehoreاو Shahjapur،  Selwanie،  Raisen او  Akodia سیمو څخه د یوه سفر په ترڅ کې لیدنه وکړه.

د دې سفر په ترڅ کې چې د آل انډیا پښتون جرګه هند (All India Pakhtoon Jargah-e-Hind) د سیدالله خان په مشرۍ برابر شوی وو د افغانستان سفیر د هغو افغانو کورنیو سره وکتل چې پورته له ۳۰۰ کلونو څخه، کله چې د دې ښار بنسټ د سردار دوست محمد خان له خوا کېښودل شوو، په بهوپال کې مېشت شوي دي.

افغان سفیر، د دې ښار د افغانانو له تاوده ښه راغلاست څخه مننه وکړه او په خپله وینا کې یې د افغانستان او هند ترمینځ د پخوانیو او ژورو فرهنګي اړیکو په اړه خبرې وکړې او د غونډې له ګډونوالو څخه یې وغوښتل چې د هند او افغانستان اړیکو د لا پیاوړتیا او پراختیا په موخه ګډې هڅې په لار واچوي.

د هند او افغانستان د تاوتریخوالي ضد خوځښت ته په اشارې سره ډاکټر ابدالي وویل: "موږ د مهاتما ګاندي او خان عبدالغفارخان فرهنګ تعقیبووو. دا فرهنګ د دواړو هېوادونو د مشرانو ترمینځ له یوې خوا د شخصي اړیکو او له بلې خوا د سیاسي اړیکو درلودل وو چې تر اوسه، ورځ په ورځ پیاوړې کېږي."

د دې سفر په ترڅ کې د افغانستان سفیر همداراز له Sanchi سیمې څخه کتنه وکړه چې د UNESCO له خوا د تاریخي اثر په توګه پېژندل شوې ده. د افغانستان او هند د ګډ تاریخ په اړه د خبرو په ترڅ کې د افغانستان سفیر وویل: "د افغانستان او هند اړیکې لرغونې مخینه لري او د تمدني اړیکو یوه بېلګه یې د افغانستان په بامیانو کې د بودا بوتونه  او بله یې په هند کې صوفیزم دی."

د بامیانو بتونو بیا رغونې ته په اشارې سره ډاکتر ابدالي وویل چې د افغانستان حکومت له UNESCO سره په اړیکه کې دي تر څو دا بتونه چې په ۲۰۰۱ کال کې د طالبانو له لوري له مینځه یوړل شول،  بیا ورغوي. د افغانستان سفیر د بامیانو بتانو په بیارغولو کې د هند د هر ډول مرستو هرکلی وکړ.

په هند کې د افغانستان سفیر بهوپال ښار ته د خپل سفر په ترڅ کې همداراز په بهوپال کې له افغان محصلینو سره هم ولیدل او د دوی ستونزې یې واورېدې او د افغانستان سفارت د پوره همکارۍ او ملاتړ ژمنه وکړه.

د یادونې وړ ده چې دا سفر به په راتلونکي کې د هند نورو ایالتونو او ښارونو ته هم دوام ومومي.