په نوي ډیلي کې د افغانستان اسلامي جمهوریت لوی سفیر ډاکټر شیدا محمد ابدالي، د روان کار د مارچ میاشتې په ۹ مه نېټه د هیماچل پردېش دولت له اعلی وزیر شري جیرام ټاکر سره وکتل.

په پیل کې دواړو پلاوو د افغانستان او هند د دوه اړخیزه اړیکو او همداراز د دې اړیکو د لا پیاوړتیا په موخه خبرې اترې وکړې.

د دې ناستې په ترڅ کې افغان سفیر د هیماچل پردیش او افغانستان د پنجشیر ولایت تر مینځ د خویندو ښارونو د رامینځ ته کېدو وړاندیز وکړ چې د شري جیرام ټاکر له خوا د ستاینې وړ وګرځېدو او وغوښتل شول تر څو د دې موضوع د تعقیب لپاره د افغانستان د بهرنیو چارو وزارت له خوا رسمي تفاهم لیک د هماچل پردیش حکومت ته ولېږل شي.

د افغانستان او هیماچل پردیش تر مینځ د فرهنګي اړیکو د لا پیاوړتیا لپاره دواړوو لورو د یوه خوراکي فستیوال د جوړولو په اړه هم خبرې اترې وکړې.

په نوي ډيلي کې د افغانستان اسلامي جمهوریت لوی سفیر ډاکټر شیدا محمد ابدالي، د فرهنګي روابطو لپاره د هند شورا (ICCR) عمومي مشرې ریوا ګانګلي داس او د (Empowerment) بنسټ مشر کمار ویکاس سکسینا د هند-افغانستان ښځو هنري نندارتون چې په آی سي سي آر کې جوړ شوی وو، د روان ۲۰۱۸ کال د مارچ میاشتې په ۵ مه نېټه پرانیستو.

دا نندارتون چې د هند او افغانستان تاریخي او فرهنګي مشترکات یې په ننداره اېښودل، د ښځو ورځې د لمانځنې په موخه د Empowerment بنسټ له لوري او د افغانستان-هند بنسټ په مالي ملاتړ جوړ شوی وو.  

د دې نندارتون د ځانګړي مېلمه په توګه، افغان سفیر د افغان او هندي ښځو له هنري نقاشیو ستاینه وکړه او په افغانستان کې د ښځو د لاسته راوړنو او له ۲۰۰۱ کال څخه وروسته د افغانستان په پرمختګ کې یې د ښځو د ونډې په اړه خبرې وکړې.

د تاریخ په اوږدو کې د هند او افغانستان تر مینځ فرهنګي او تاریخي مشترکاتو ته په اشارې سره، ډاکټر ابدالي دا اړیکي بې ساري وګڼلې او زیاته یې کړه چې دا زموږ د نسل دنده ده تر څو د اوسنیو شونتیاوو په کارونې سره دا اړیکې لا پیاوړې کړو.

ډاکټر ابدالي له Empowerment  بنسټ څخه په مننې سره د ورته نندارتونو د جوړولو لپاره چې د دواړو ملګرو هېوادونو د فرهنګي اړیکو د لا پیاوړتیا لامل کېږي، هیله څرګنده کړه.

د یادونې وړ ده چې په دې نندارتون کې له افغانستان او هند څخه ۱۰ مېرمنو ګډون کړی وو او خپلې هنري نقاشۍ یې په ننداره اېښودلې وې.

 

 

 

په نوي ډيلي کې د افغانستان د اسلامي جمهوریت لوی سفیر ډاکټر شیدا محمد ابدالي، د روان زېږدیز کال د فبرورۍ په ۲۲ مه نېټه په هند کې د امریکې د متحده ایالاتو له سفیر کنیت جستر سره وکتل.

د دې ناستې موخه د افغانستان او امریکې متحده ایالاتو تر مینځ د دوه اړخیزه اړیکو او د دې اړیکو د لا پیاوړتیا په اړه د خبرو اترو کول وو.

له ۲۰۰۱ کال څخه وروسته د افغانستان په بیا رغونه کې د امریکې متحده ایالتونو د ونډې په ستایلو سره، ډاکټر ابدالي د امریکې متحده ایالتونو سفیر ته په افغانستان کې د وروستیو پرمختګونو په اړه لنډ مالومات وړاندې کړل.

افغان سفیر همداراز د افغانستان او سویلي اسیا لپاره د امریکې متحده ایالتونو نوې پالیسي وستایله او زیاته یې کړه چې دا پالیسي جامع ده او د هند په شراکت، له تروریزم سره د مبارزې په برخه کې واضح او روښانه ده.

د افغانستان او سویلي اسیا لپاره د امریکې متحده ایالتونو نوې پاليسۍ د ژر تر ژره پلي کولو په اړه افغان سفیر د امریکا-هند-افغانستان تر مینځ د درۍ اړخیزه ډیالوګ د رامینځ ته کولو وړاندیز وکړ.

د امریکې متحده ایالتونو سفیر له افغانستان سره د امریکې متحده ایالتونو له ژمنتیا یې اطمینان ورکړ او د افغانستان او سویلي اسیا لپاره د امریکې نوې پالیسۍ د ژر تر ژره پلي کولو په برخه کې یې د امریکې-هند-افغانستان د دری اړخیزه ډیالوګ پر ارزښت یې ټینګار وکړ

په نوي ډیلي کې د افغانستان د اسلامي جمهوریت لوی سفیر ډاکټر شیدا محمد ابدالي د روان کال د فبرورۍ په ۲۰ مه نېټه د سنټ سټیفن کالج په دیالوګ کې وینا وړاندې کړه.

افغان سفیر "د نړۍ ځواکونه او حکومتدارۍ" په اړه د خبرو په ترڅ کې د افغانستان او هند تر مینځ پر دوه اړخیزو اړیکو هم رڼا واچوله.

په نړۍ کې اوسنیو حالاتو، فرصتونو او ستونزو ته په اشارې سره، ډاکټر ابدالي همداراز په نړۍ کې د اوسنیو ستونزو لپاره د حل لارې موندلو او همداراز د تروریزم پر وړاندې د مبارزې په برخه کې د دریو ستراتیژیکو شریکانو په توګه د افغانستان، هند و امریکې متحده ایالاتو د ونډې په اړه خبرې وکړې. افغان سفیر د افغانستان او سویلي اسیا لپاره د امریکې متحده ایالتونو پالیسي جامع او پراخه وبلله او زیاته یې کړه: "اوس مهال، افغانستان، هند او د امریکې متحده ایالتونه د دې ستراتیژۍ پر پلي کولو او همداراز د یوې سیمه ایزې اجماع پر جوړولو کار کوي تر څو په سیمه کې سوله او ثبات رامینځ ته شي. "

ډاکټر ابدالي همداراز له لویدیځ څخه ختیځ ته د اقتصادي ځواک د لېږد په اړه خپل نظر څرګند کړ، په دې اړه د هند او د هند اړونده پالیسي یې وستایله او همداراز یې د اقتصادي ځواک د بریالي لېږد لپاره د سیمه ایزو هېوادونو پر یوالي او همکارۍ ټینګار وکړ.

د سنټ سټیفن کالج ډیالوګ د روان کال د فبرورۍ میاشتې پر ۱۹ مه او ۲۰ مه نېټه په نوي ډیلي کې جوړ شوی وو او موخه یې د نظریو او اندونو شریکول وو. په دې ډیالوګ کې ګډونوال د یو شمېر نامتو شخصیتونو لکه ورون ګاندهي-د پارلمان غړي، سوشمیتا دیف-د پارلمان غړې او د (India Mahila Congress) مشره، انور حلیم-دیپلومات، ماني شنکر-د هند پخواني دیپلومات، کاظم رضوی-د نوموړي ډیالوګ بنسټ اېښودونکي، آمنه میرزا-لیکوالې او بریج بهاوا-کارپوه او د (Business World) ایډیټر د ویناوو شاهد پاتې شول.

 

 

په نوي ډیلي کې د افغانستان د اسلامي جمهوریت لوی سفیر ډاکټر شیدا محمد ابدالي د روان کال د فبرورۍ په ۸ مه نېټه د Oasis IAS له لسو تنو محصلینو سره د افغانستان سفارت په مقر کې وکتل.

له دې ناستې څخه موخه دې زده کوونکو ته د افغانستان او هند ترمینځ د دوه اړخیزه اړیکو او همداراز د دواړو هېوادونو د فرهنګي تبادلې په اړه مالومات ورکول وو.

په پیل کې د افغانستان سفیر دې ځوانانو ته د هېوادونو د بهرنیو ماموریتونو او دا چې څه دول ښايي خپلو موخو ته ورسېږي، مالومات وړاندې کړل او زیاته یې کړه: "د هر هېواد بهرنی ماموریت له کوربه هېواد سره د اړیکو لا پیاوړي کول دي."

ډاکټر ابدالي همداراز په افغانستان کې د سوداګرۍ، پانګونې، کانونو او زده کړو په اړه د وروستیو پرمختګونو په اړه مالومات وړاندې کړل.

د هند او افغانستان تر مینځ  دوه اړخیزه اړیکو ته په اشارې سره، د افغانستان سفیر وویل: " زموږ اړیکې پر مشترکو موخو ولاړې دي چې د پخوانیو تاریخي او فرهنګي روابطو پر بنسټ جوړې شوې دي."

د دي ناستي په ترڅ کې ډاکټر ابدالي د ځوانو محصلینو پوښتنو ته په افغانستان کې د تحصیلي اسانتیاوو، ځوانانو، سیاست او اقتصاد په اړه ځوابونه وویل.

د یادونې وړ ده چې Oasis IAS اکاډمي د هند ملکي خدمتونو ازموینې په موخه د ځوانانو د اماده کولو لپاره جوړه شوې او داسې خپرونې رانغاړي چې د ملکي خدمتونو ټولې مرحلې پکې شاملې شوې دي.