په نوي ډیلي کې د افغانستان اسلامي جمهوریت لوی سفیر ډاکټر شیدا محمد ابدالي د روان کال د اپرېل میاشتې په ۹ مه نېته د هند جمهوریت مهراشترا ایالت په ممبۍ ښار کې له مېشتو افغانانو سره وکتل او "ّپښتون بنسټ" یې پرانیستلو.

په هغه لمانځغونډه کې چې په همدې موخه جوړه شوې وه او پکې شا او خوا ۱۰۰۰ تنو افغانانو ګډون کړی وو، ډاکټر ابدالي د افغانستان او هند تر مینځ فرهنګي اړیکو د لاپیاوړتیا په برخه کې د دوی د ونډې او مسؤلیت په اړه خبرې وکړې.

افغان سفیر همداراز په ممبۍ کې مېشتو افغانانو ته د یو والي او اتحاد سپارښتنه وکړه او له هغوی یې وغوښتل تر څو د لا روښانه راتلونکي لپاره یې ځوانان لوړو زده کړو ته وهڅوي.

پښتون بنسټ (Pashtoon Trust) په ممبۍ ښار کې د مېشتو افغانانو له خوا ۷۰ کاله د مخه جوړ شوی وو او په دې ښار کې د افغانانو د ژوند د کیفیت او یوالي په موخه، پر فرهنګي چارو، لوړو زده کړو، روغتیايي چارو او نورو اسانتیاوو باندې له ځانګړي تمرکز سره یو ځل بیا پرانیستل شو.

په نوي ډیلي کې د افغانستان اسلامي جمهوریت لوی سفیر ډاکټر شیدا محمد ابدالي د روان کال د اپرېل میاشتې په ۹ مه نېټه د هند جمهوریت مهراشترا ایالت له والي سی. ویدیاساګر راو (C. Vidyasagar Rao) سره وکتل.

د دې ناستې موخه د هند او افغانستان تر مینځ د سوداګریزو، فرهنګي او تحصیلاتي اړیکو او د دې اړیکو د لا پراختیا په اړه د خبرو اترو کول وو.

د ناستې په ترڅ کې دواړو پلاوو د "پانیپت" فلم او د هند او افغانستان پر اړیکو باندې د دې فلم د اغېزو په اړه خبرې وکړې. ډاکټر ابدالي د دواړو هېوادونو د پخوانیو فرهنګي اړیکو د پراختیا او لاغښتلتیا په برخه کې د هندي سینما د ونډې په اړه هم خبرې وکړې.

کابلي والا او خداګوا د بالیوډ سینما د هغو فلمونو له جملې څخه دې چې د افغانستان او هند خلکو له لوري په خورا لویه کچه ستایل شوي او د دواړو هېوادونو د خلکو ترمینځ پر اړیکو یې مثبتې اغېزې درلودلې دي.

پانیپت فلم چې پر احمد شاه بابا ابدالي او د ۱۷۶۱ کال د پانیپت په دریمه جګړه تمرکز کوي، د بالیوډ سینما له لوري په نږدې راتلونکي کې جوړيږي او لوبغاړي یې سنجی دت، ارجون کپور او کریتي سانن دي.

د مهراشترا والي هم د دواړو هېوادونو تر مینځ د فرهنګي اړیکو د پیاوړتیا په برخه کې د بالیوډ فلمونو د ونډې او مثبتو اغېزو په اړه خبرې وکړې او افغان سفیر ته یې ډاډ ورکړ تر څو دا موضوع په بالیوډ کې له اړوندو چارواکو سره شریکه کړي او باور تر لاسه کړي چې هندي سینما د هند او افغانستان د اړیکو د پراختیا په برخه کې خپل کار ته د پخوا په شان دوام ورکړي. د دې تر څنګ، د مهراشترا والي د پونا سینما انسټیټیوټ کې د افغان ځوانانو لپاره د روزنې وړاندیز هم  وکړ.

ډاکټر ابدالي، د مهراشترا والي له دې وړاندیز څخه په مننه، د افغانستان او هند تر مینځ د فرهنګي او تحصیلي اړیکو باندې یې د مثبتو اغېزو په اړه خبرې وکړې او په دې انسټیټیوت کې یې د افغان ځوانانو د معرفي کولو په اړه ډاډ ورکړ.

د دې ناستې په ترڅ کې ډاکټر ابدالي همداراز وړاندیز وکړ تر څو د کندهار او ممبۍ ښارونو تر مینځ د خویندو ښارونه جوړ شي. د مهراشترا والي له دې وړاندیز څخه هرکلی وکړ او د دې موضوع د تعقیب کولو ژمنه یې وکړه.

په نوي ډیلي کې د افغانستان اسلامي جمهوریت لوی سفیر، ډاکټر شیدا محمد ابدالي، د روان زېږدیز کال د اپرېل په ۵ مه نېټه په هند کې د صربستان جمهوریت له سفیر ولادمیر مریک سره په خپل کاري دفتر کې وکتل.

د دې ناستې په ترڅ کې دواړو پلاوو د افغانستان او صربستان د دوه اړخیزه اړیکو او د دې اړیکو د لاپیاوړتیا په اړه خبرې اترې وکړې.

دواړو سفیرانو همداراز د افغانستان او سیمې امنیتي ستونزو او همداراز پرمختګونو په اړه خبرې وکړې.

د ناستې په پای کې دواړو پلاوو د افغانستان او صربستان تر مینځ د اړیکو د لا پیاوړتیا او لا ډېرو همکاریو لپاره د خپلو دفترونو په منظمو اړیکو ټینګار وکړ.

.

په نوي ډیلي کې د افغانستان اسلامي جمهوریت لوی سفارت، د فرهنګي اړیکو لپاره د هند شورا (ICCR)، جواهرلال نهرو پوهنتون او افغانستان-هند بنسټ په همکارۍ د روان زېږدیز کال د مارچ په ۲۰ مه نېټه د ۱۳۹۷ نوی کال د جواهرلال نهرو د فارسي او مرکزي اسیا د مطالعاتو په مرکز کې ولمانځلو.

دا لمانځنه د دواړو هېوادونو د ملي سرود له خپرولو څخه وروسته، په نوي ډیلي کې د افغانستان اسلامي جمهوریت لوی سفیر په وینا پرانیستل شوه.

د ICCR، جواهرلال نهرو پوهنتون او افغانستان-هند بنسټ له همکارۍ څخه په مننه، ډاکټر ابدالي ټولو ته د نوي کال مبارکۍ وویله او په افغانستان کې یې د نوروز د تاریخچې په اړه خبرې وکړې. افغان سفیر وویل:"نوروز د هغو هېوادونو لپاره چې ترې لمانځنه کوي، تر ټولو زوړ جشن دی چې له بلخ او بومي څخه یې سرچینه اخیستې او د تاریخ په لړ کې له بلخ څخه سویلي اسیا، د ګنګا او جمنا په لور او لویدیځ ته، د عرب دریاب په لور غځیدلی. نن دا تمدن او د هغه انعکاس لمانځو چې هند او افغانستان سره نښلوي."

د دې محفل په ترڅ کې د جواهرلال نهرو پوهنتون د پښتو څانګې هندي زده کوونکو د پښتو ترانو د ویلو سربېره کلاسیک افغانی موزیک او همداراز ملي او محلي نڅاوې وړاندې شوې او مېلمانه د افغاني خوراکونو سربېره په هفت مېوې او نوروزي کلچو ونازول شول.

په دې لمانځنه کې د افغانستان، هند، تاجکستان، ایران، آذربایجان، ازبکستان او یو شمېر نورو هېوادونو محصلینو ګډون کړی وو.

د یادونې وړ ده چې نوروز د زده کړو، ساینس او فرهنګ لپاره د ملګرو ملتونو نمایندګۍ (UNESCO) له خوا په ۲۰۱۰ کال کې د نړیوالې ورځې په توګه وپېژندل شو او هر کال د ګڼ شمېر هېوادونو له خوا د نړۍ په ګوټ ګوټ کې لمانځل کېږي.

 

 

 

 

 

 

 

 

 

 

 

 


 

په نوي ډیلي کې د افغانستان اسلامي جمهوریت لوی سفیر ډاکټر شیدا محمد ابدالي د شملې په ښار کې د هیماچل پردېش له پوهنتون څخه د روان کال د مارچ میاشتې په ۹ مه نېټه کتنه وکړه. د دې کتنې په ترځ کې افغان سفیر د دې پوهنتون له مرستیال پروفیسور آر اس چوهان او همداراز په دې پوهنتون کې له افغان محصلینو سره وکتل.

د هیماچل پردېش پوهنتون له مرستیال سره د ناستې په ترڅ کې، ډاکټر ابدالي د افغان ځوانانو د ظرفیت جوړولو په برخه کې د دې پوهنتون هڅې وستایلې. افغان  سفیر همداراز د هیماچل پردېش پوهنتون او د افغانستان پوهنتونونو ترمینځ د همکاریو د رامینځ ته کېدو وړاندیز وکړ.

د دې کتنې په ترڅ کې، افغان سفیر د هغو افغان محصلینو سره هم وکتل او هغوی یې وهڅول تر څو له دغه فرصت څخه چې دوی ته ورکړل شوی دی، په اعظمه توګه استفاده وکړي او هېواد ته د خدمت جوګه شي.

وروسته له دې چې د محصلینو ستونزو ته غوږ شو، ډاکټر ابدالي ممتاز زده کوونکي د ستاینلیکونو په ورکولو سره ونازول.

د یادونې وړ ده چې په هیماچل پردېش پوهنتون کې ۵۰ افغان محصلین چې د افغان حکومت کارکوونکي دي، د آی سي سي آر بورسیې له طریقه په زده کړو بوخت دي.