په نوي ډیلي کې د افغانستان اسلامي جمهوریت لوی سفیر ډاکټر شیدا محمد ابدالي، د روان کال د مې په ۱۷ مه نېټه د پوهنتونونو مالي ملاتړ کمیسیون (University Grants Commission) له مشر پې پې سینګ سره په خپل کاري دفتر کې وکتل.

د دې ناستې موخه په جواهرلال نهرو پوهنتون کې د ژبو دیپارتمنت په چوکاټ کې د ماسترۍ دورې لپاره د پښتو ژبې د کرسۍ رامینځ ته کول وه.

د دې ناستې په ترڅ کې ډاکټر ابدالي له افغانستان سره د زده کړو او ظرفیتونو د لوړولو په برخه کې د هند هېواد له مرستو او همکاریو یادونه وکړه.

په جواهرلال نهرو پوهنتون کې د پښتو ژبې د کرسۍ د رامنیځ ته کولو د ارزښت په اړه د خبرو په ترڅ کې افغان سفیر د UGC له مشر څخه وغوښتل تر څو د دې کرسۍ لپاره بودجه ځانګړې کړي.

په ځواب کې د UGC مشر افغان سفیر ته د یوه کمیسیون د جوړېدو په اړه خبر ورکړ چې په همدې اړه کار وکړي او په  راتلونکو دریو اونیو کې په نوموړي پوهنتون کې د پښتو ژبې کرسۍ لپاره بودجه جوړه کړي.

 

 

 

 

 

 

په نوي ډيلي کې د افغانستان اسلامي جمهوریت لوی سفیر ډاکټر شیدا محمد ابدالي، د روان کال د مې میاشتې په ۱۴ مه نېټه د نړیوالې پراختیا لپاره د امریکا متحده ایالاتو نمایندګۍ (USAID) له هیئت سره په خپل کاري دفتر کې وکتل.

دې هیئت د پاکستان او افغانستان چارو د دفتر (Office of Afghanistan and Pakistan Affairs) مرستیال، ګریګ هوګر په استازي توب په دې ناسته کې ګډون کړی وو.

د دې ناستې په ترڅ کې نوموړي هیئت د افغانستان او سویلي اسیا لپاره د امریکې متحده ایالاتو د پالیسۍ په چوکاټ کې له افغانستان سره د USAID پر همکاریو باندې له تمرکزسره، د افغانستان لپاره د پراختیايي پروژو د پلان په اړه خبرې وکړې. 

دواړو پلاوو د هوساینې په لور لار (Passage to Prosperity) د دویم پړاو په اړه چې د روان کال سپټمبر په میاشت کې به د هند هېواد په ممبۍ ښار کې جوړ شي، خبرې وکړې.

نوموړي هیئت همداراز افغان سفیر ته د USAID د وروستیو پروژو په اړه چې د افغانانو لپاره د واحد توقف بازار (One-Stop Shop) هم رانغاړي او له ګمرک څخه د افغانانو د صادراتو لپاره لار پرانیزي، خبرې وکړې. د دې بازار په اړه د افغانستان او امریکې متحده ایالتونو د سوداګرۍ په دیارلسم کلني کنفرانس کې تصمیم ونیول شو. دا کنفرانس همداراز د دې لامل شو تر څو د افغانستان د هوايي دیپارتمنت او USAID تر مینځ د افغانستان د هغو تولیداتو تړون لاسلیک شي چې د کابل، هرات، کندهار او مزار شریف له  هوايي ډګر څخه لېږل کېږي.

د افغانستان سوداګرۍ د ودې په اړه د خبرو اترو په ترڅ کې افغان سفیر د "افغانستان د تولیداتو زون" چې په هند کې به پرانیستل شي، او د ښې بازارموندنې د اسانتیا او د افغانستان په صادراتو کې به د چټکتیا د رامینځ ته کېدو لامل شي، خبرې وکړې. همداراز افغان سفیر د افغانستان، امریکې متحده ایالاتو او هند تر مینځ د سوداګریزو همکاریو د پراختیا په موخه د سوداګریزو خونو د رامینځ ته کېدو وړاندیز وکړ تر څو ښه اقتصادي ثبات رامینځ ته شي.

افغان سفیر وویل: "هند همکار هېواد دی او کولی شي له افغانستان سره مرسته وکړي. له هند سره په همکارۍ، د USAID پروژې به د افغانستان په پراختیا کې د پام وړ لاسته راوړنې ولري."

د افغان سفیر او USAID پلاوي ترمینځ ناستې د اقتصادي فرصتونو د رامینځ ته کېدو او همداراز د افغانستان، امریکي متحده ایالاتو او هند تر مینځ د دری اړخیزه همکاریو د پراختیا په اړه ښې پایلي درلودې.

د دې ناستې په ترڅ کې همداراز وړاندیز وشو تر څو دا ډول غونډې وخت په وخت رامینځ ته شي تر څو په افغانستان کې د پروژو د چټکتیا او د Passage to Prosperity غوندې نندارتونونو او  ورته خپرونو د ادامې لپاره اړوند مالومات وړاندې شي.

دا نندارتون د ۱۳۹۷ کال د ثور په ۲۴ نیټه هند کې د افغانستان د اسلامي جمهوریت د لوی سفیر ډاکتر شیدا محمد ابدالی لخوا د پټۍ په پرې کیدو سره د افغانستان سفارت په ګندهارا تالار کې پرانیستل شو.

په دغه نندارتون کې د افغان هنرمندانو تر څلویښت زیات نقاشی شوی اثار د افغانو ښځو لاسي صنایع، ډبرین اثار، په لاس جوړې شوې جامې او د تاریخي اثارو اخیستل شوې کاپي ګانې نندارې ته وړاندی شول. یاد نندارتون د اطلاعاتو او فرهنګ وزارت او په نوي ډیلی کې د دوو افغان سوداګرو په مالی مرسته د افغانستان د فرهنګي اتشه لخوا ترتیب شوی وو.

په هند کې دوستو هیوادونو په لسګونو  دیپلوماتانو، فرهنګیانو، نقاشانو، محصلینو او ګڼو مینه والو په دې نندارتون  کې د ایښودل شویو اثارو ننداره وکړه.

په هند کې د افغانستان سفیر ډاکتر شیدا محمدابدالي دغه نندارتون د پرانیستی په مراسموکې  په خپله وینا کې کې د افغانستان د فرهنګ مخینې ته په کتو سره وویل، چې د افغانستان ستر تمدن نړۍ ته بې سارې توکي وړاندې کړي، چې د افغانستان نوم جغرافیه کې د مختلف عصر هنرمندانو پنځولې دي.

هغه زیاته کړه، چې افغانستان له پیړیو پیړیو راهیسې د نړۍ خلکو ته هنر صادر کړی او دا د څو لسیزو اوږدې جګړې ته به کتو سره د افغانستان د خلکو تمدن او له هنر سره مینه ښيي.

ددی سفارت کلتوری اتشه اجمل عالم زی چې دیاد نندارتون مسوولیت پر غاړه لری وویل ((افغانستان او دوست هیواد هندوستان بی شماره فرهنګي مشترکات لری چې له هغی جملی یو هم د نقاشی هنر ده چې دواړه سترملتونه یی سره نیژدی کړی دی. دا نندارتون په همدی موخه پرانیستل شوی، ترڅو د دواړو دوستو هیوادونو هنروال، انځورګران او فرهنګیان لا سره نږدې او د هند خلک د افغانستان د هنر له تاریخ سره لا ډیر بلد شي)).

نوموړی زیاته کړه دا فرهنګي تابلوګانی او فرهنګي غرفه به له دی وروسته د نوي ډیلی په مختلفو پوهنتونو او فرهنګي ځایونو کې ننداری ته وړاندی شی.

دغه نندارتون د ۱۳۹۷ کال د ثور په ۲۰ د ماښام په ۶ بجو د افغانستان د لوی سفیر ډاکتر شیدا محمد ابدالي په وینا پیل او د همدې ما ښام افغان سوداګروته د ستاینلکونو او ډالیو په ورکولو په ۹:۰۰ بجو پای ته ورسید.

 

 

 

 

په نوي ډیلي کې د افغانستان اسلامي جمهوریت لوی سفیر ډاکټر شېدا محمد ابدالي د روان کال د می میاشتې په ۱۰ مه نېټه د هند کرکټ بورډ له ډاېرکټر امیتاب چودهري سره په نوي ډیلي کې د افغانستان سفارت په مقر کې وکتل.

په پیل کې ډاکټر ابدالي مېملنو ته ښه راغلاست ووایه، ورپسې يې د کرکټ په برخه کې له افغانستان سره د هند کرکټ بورډ او په ځانګړې ټوګه د هند د بهرنیو چارو وزارت هڅې وستایلې او هم یې د IPL په کلنیو سیالیو کې د افغان لوبغاړو د ګډون له امله خوښي څرګنده کړه. افغان سفیر کرکټ د یوالي، خوښۍ او پرمختګ لامل وګاڼه.

د ناستې په ترڅ کې د هند کرکټ بورډ ډاېرکټر د دواړو هېوادونو ترمنځ د کرکټ په برخه کې د همکاریو په پیاوړتیا ټینګار وکړ او په IPL سیالیو کې یې د افغان لوبغاړو د کلیدي رول ستاینه وکړه.

نوموړي زیاته کړه چې د روان کال د جون میاشتې په څوارلسمه نېټه به افغان ملي لوبډله په بنګلور ښار کې د هند له ملی لوبډلې سره یوه پینځه ورځنۍ ټېسټ سیالي ولري چې د دواړو لورو څخه به لوړ پوړي چارواکي د لوبې نندارې ته هم راوبلل شي.

په نوي ډیلي کې د افغانستان اسلامي جمهوریت لوی سفیر ډاکټر شیدا محمد ابدالي، د روان کال د مې میاشتې په ۵ مه نېټه پر افغان ژورنالستانو باندې د وروستیو بریدونو اړوند ناسته کې چې په نوي ډیلي کې د سویلي اسیا د بهرنیو ژورنالستانو کلب (Foreign Correspondents Club South Asia) له لوري جوړه شوې وه، وینا وړاندې کړه.

د ۱۱ خبریالانو د شهادت په موخه د تسلیت په وړاندې کولو او له FCC څخه د افغان ژورنالستانو په ویاړ د غونډې د جوړلو لپاره په مننې سره ډاکټر ابدالي د دې بریدونو د موخو او عواملو په اړه خبرې وکړې او ویې ویل: "د دې بریدونو پیغام ښکاره وو. پیغام دا وو تر څو د انصاف، عدالت، برابري او ډیموکراټیکو اصولو لپاره پورته شوي اوازونه بند کړي."

د دې غونډې په ترڅ کې افغان سفیر په لنډه توګه له ۲۰۰۱ کال څخه وروسته د افغان رسنیو د پرمختګ په اړه خبرې وکړې. په افغانستان کې د رسنیو ازادۍ ته په اشارې سره ډاکټر ابدالي وویل: "زما په اند په افغانستان کې د رسنیو ازادۍ په سیمه کې تر ټولو پراخه او ازاده ده چې د افغانستان د اساسي قانون له لوري یې هم ملاتړ کېږي."

په همدې توګه افغان سفیر د رسنیو د ملاتړ لپاره د افغانستان حکومت پلانونو په اړه هم خبرې وکړې او زیاته یې کړه چې مالوماتو ته د ژورنالستانو د لاس رسي او همداراز د ځانګړو رسنیو د رامینځ ته کېدو او فعالیت اړوند نوي قانون سربېره، د افغانستان حکومت هڅه کوي تر څو د افغان ژورنالستانو لپاره د امن چاپېریال رامینځ ته کړي.

د خپلې وینا په پای کې افغان سفیر زیاته کړه چې د افغانستان حکومت به ډاډ ترلاسه کړي چې خپلې ټولې شونتیاوې وکاروي تر څو د افغانستان ژورنالستانو ته امن کاري چاپېریال برابر کړي. ډاکټر ابدالي همداراز د نړۍ د خبریالانو له بنسټونو څخه وغوښتل تر څو د نړۍ د ژورنالستانو د ملاتړ لپاره سره یو شي.