په نوي ډيلي کې د افغانستان اسلامي جمهوریت لوی سفیر ډاکتر شېدا محمد ابدالي، د روان زېږدیز کال د سپټمبر په ۲۰ مه نېټه په نوي ډیلي کې له مېشتو بهرنیو سفیرانو او ډیپلوماټانو سره د یوې تودیعي غونډې په ترڅ کې وکتل.
په دې غونډه کې د بهرنیو ډیپلوماټانو سربېره یو شمېر بهرنیو ژورنالیستانو، په هند کې مېشتو افغان محصلینو او ددې سفارت کارکوونکو هم ګډون کړی وو.
ښاغلي سفیر په خپله وینا کې وویل چې له دې مقام څخه یې د استعفا موخه په افغانستان کې د سولې او ټیکاو لپاره کار کول دي.
جلالتماب سفیر په یوه جلا ناسته کې افغان محصلینو سره وکتل او هغوئ یې وهڅول تر څو یوازې په خپلو زده کړو تمرکز وکړي او د بهرنیو زده کوونکو تر منځ د ګران هېواد نوم لا روښانه کړي.

په نوي ډيلي کې د افغانستان اسلامي جمهوریت لوی سفارت، د روان زېږدیز کال د سپټمبر په ۲۰ مه نېټه د افغانستان ا.ج لوی سفیر ښاغلي ډاکتر شیدا محمد ابدالي لپاره د خدای پامانۍ غونډه جوړه کړه.

په دې غونډه کې چې د سفارت په انګړ کې جوړه شوې وه د دې سفارت ټولو کارکوونکو ګډون کړی وو.

افغان سفیر د خپلې وینا په ترڅ کې د سفارت کارکوونکو ته د ښه راتلونکي هیله وکړه او زیاته یې کړه: "د دې هوډ تر شا زما موخه وطن ته بېرته تګ او په هېواد کې د سولې لپاره کار کول دي."

د غونډې په پای کې ددې سفارت ډیپلوماټانو له لوري ښاغلي سفیر ته د هغوئ د کړیو خدمتونو د ستاینې په موخه بېلابېلې ډالۍ ورکړل شوې.

د یادوني وړ ده چې ډاکتر شېدا محمد ابدالي تېره ورځ خپله استعفاء نوي ډیلي ته د ولسمشر غني د یوه ورځني سفر په لړ کې وړاندې کړه.  ډاکتر ابدالي له دې وړاندې د افغانستان د ملي امنیت شورا د مرستیال په توګه هم کار کړی او له ۲۰۱۲ کال راهیسې یې په نوي ډیلي کې د هېواد د لوی سفیر په توګه دنده ترسره کوله.

 

په نوي ډيلي کې د افغانستان اسلامي جمهوریت لوی سفیر ښاغلي ډاکتر شیدا محمد ابدالي، د روان کال د سپتمبر په ۱۷ مه نېټه د بهرنیو چارو وزارت له مرستیال وزیر ښاغلي ویجې کیشف ګهوکلې سره وکتل.

د دې ناستې په ترڅ کې دواړو خواوو د افغانستان او هند تر مینځ د دوه اړخیزه اړیکو او همداراز د دې اړیکو د لا پراختیا په لارو چارو خبرې وکړې.

افغان سفیر همداراز د ستراتیژیک مشارکت تړون (Strategic Partnership Agreement)  د شورا د غونډې په اړه هم خبرې وکړې چې ټاکل شوې سږ کال په کابل کې جوړه شي.

دواړو لورو همداراز په افغانستان او سیمه کې د اوسنیو ستونزو، په ځانګړې توګه تروریزم او د هغې د حل لارې پر موندلو ټینګار وکړ.  

په نوي ډیلي کې د افغانستان اسلامي جمهوریت لوی سفارت، نن ماسپښین د روان زېږديز کال د سپټمبر په ۱۰ مه نېټه د شهید اونۍ د سفارت په انګړ کې ولمانځله.

دا لمانځنه د قرآن عظیم الشان په ختم سره پیل شوه چې پکې په نوي ډیلي کې مېشتو افغانانو،د قرآن عظيم الشان حافظانو، افغان محصلینو او د سفارت کارکوونکو ګډون کړی وو.

د سپېڅلي قرآن له ختم څخه وروسته ډاکتر شېدا محمد ابدالي، د افغانستان اسلامي جمهوریت لوی سفیر ټولو ګډونوالو ته ښه راغلاست ووایه او په دې مراسمو کې یې د هغوئ د ګډون له امله مننه وکړه، زیاته یې کړه: :"افغانستان شهید پاله هېواد دی. موږ په خپلو هغو شهیدانو ویاړو چې په تېرو ۴۰ کلونو کې یې ځانونه د ازادۍ لپاره قربان کړي او نن موږ د هغوی له ګټل شوې ازادۍ څخه برخمن یو."

افغان سفیر د خپلې وینا په ترڅ کې وویل: مونږ افغانان باید د خپلو شهیدانو د ارمانونو د پوره کولو او همداراز په هېواد کې دسراسري سولې او امن د تآمین په موخه کار وکړو تر څو داسې یوه ورځ راشي چې د خپلو ټولو شهيدانو ارمانونه مو پوره کړي وي.

په نوي ډیلي کې د افغانستان اسلامي جمهوریت لوی سفیر ډاکټر شیدا محمد ابدالي د روان کال د اګست میاشتې په ۳۰ مه نېټه د "Passage to Prosperity"کلني نندارتون: د افغانستان-هند سوداګریز نندارتون په رسنیزه پرانیستغونډه کې ګډون وکړ.

نومووړی نندارتون د امریکا د متحده ایلاتو د پراختیا نړیوالې ادارې (USAID) له لوري د افغانستان او هند په همکارۍ د سپټمبر له ۱۲ څخه تر ۱۵ پورې د ممبۍ په ښار کې دایرېږي.

ډاکتر ابدالي په دې پرانیستغونډه کې د خپلې وینا په ترڅ کې وویل: "افغانستان د USAID په همکارۍ سره توانېدلی تر څو خپل سوداګریز او صادراتي سیسټمونه بیا رامینځ ته کړي. هوايي دهلیز د ځمکني ټرانسپورټ په پرتله د افغانستان د صادراتو او سوداگرۍ د پرمختګ لپاره اغېزمنه او چټکه لاره ثابته شوې ده. اټکل کېږي چې د افغانستان او هند تر مینځ سوداګریزې اړیکې د ۲۰۲۰ کال تر پایه ۲ بیلیارده امریکايي ډالرو ته ورسېږي. د Passage to Prosperity نندارتون د افغانستان او د نړیوالو بازارنو ترمینځ  د اړیکو د پیاوړي کولو لپاره مهم لامل ګڼل کېدای شي.

د یادونې وړ ده چې د Passage to Prosperity په څلور ورځني نندارتون کې به ۶۰۰  افغانی او سوداګر سره یو ځای شي. په دې نندارتون کې به افغان سوداګر افغانی تولیدات، قالینې او قیمتي ډبرې به نندارې ته وړاندې کړي. د دې نندارتون لومړی پړاو چې په ۲۰۱۷ کال کې په نوي ډیلي کې جوړ شوی و د هندي او افغانی سوداګرو تر مینځ د ۲۷ ملیونو ډالرو په ارزښت تړونونه لاسلیک شول.

د داسې نندارتونو په جوړولو سره به افغاني سوداګر وکړائ شي تر څو د نورو هېوادونو له سوداګرو او نړیوالو بازارونو سره سوداګریزې اړیکې لا پراخې کړي.