په نوي ډیلي کې د افغانستان د اسلامي جمهوریت لوی سفارت سرپرست او مرستیال محمد میرویس بلخي د روان زېږدیز کال د اکتوبر په ۱۱ مه نېټه د "علامه اقبال لاهوري کلیات: منظومه ژباړه" کتاب په پرانیستغونډه کې چې د نوي ډیلي پوهنتون د فارسي ادبیاتو په ډیپارټمنټ کې جوړه شوې وه وینا وکړه.

ښاغلي بلخي په دې غوڼده کې د علامه اقبال د اردو شعرونو د کلیاتو ژباړونکی محمد افسر رهبین کار په فارسي ژبه کې بی ساري وبللو او زیاته یې کړه: "ښاغلي رهبین په خپل دې عالي کار سره علامه اقبال ته د دري ژبو په مینځ کې بله څېره ورړکه."

د افغانستان سفارت سرپرست علامه اقبال نه یواځې یو ماهر شاعر، بلکې یو فلیسوف شاعر هم وبللو او د داسې متفکر انسان د پیغام لېږد یې سخت کار وګنلو او ویې ویل: "د اقبال په راپېژندلو سره، دې ژباړونکی په واقعیت کې د یوه نوي اقبال په توګه سر راوچت کړی او دا کار به پرته له شکه پر اقبال پېژندونکو او د اقبال پر مینه والو ژوره اغېزه پرېباسي."

په دې غونډه کې همداراز افغان لیکوال پرتو نادري، د ډیلي پوهنتون د فارسي ژبې مشر پروفیسور اشرف علیم خان، د جواهر لال نهرو پوهنتون د فارسي ژبې استاد پروفیسور اختر حسین کاظمی او د فارسي ژبې نورو اساتیدو او محصلینو ګډون کړی وو.

د هند بهرنۍ سوداګرۍ مطالعاتو مرکز او د افغانستان سوداګرۍ او صنایعو وزارت کارکوونکو ترمینځ د تړون پر بنسټ، د روان زېږدیز کال د اکټوبر پر ۹ مه نېټه د افغانستان سوداګرۍ او صنایعو وزارت کارکوونکو لپاره  پنځه ورځني روزنیز کورس د افغانستان سوداګرۍ او صنایعو وزارت د معینې کامله صدیقی، په نوي ډیلي کې د افغانستان سفارت شارژدافیر میرویس بلخی، د دې سفارت اقتصادي مستشار احمد شعیب حبیبی او د هند د سوداګرۍ او صنایعو وزارت معینې ریتا تویتیا له خوا پرانیستل شو.

اغلې کامله صدیقي د سوداګرۍ په برخه کې د دولتي کارکوونکو د ظرفیتونو لوړول د افغانستان لپاره اړین وبلل او زیاته یې کړه: "د نړیوالې سوداګرۍ په برخه کې د ظرفیتونو د لوړولو اړوند روزنیزې خپرونې د افغانستان په اقتصادي وده کې اړینه ونډه درلودلی شي."

د افغانستان سفارت مرستیال میرویس بلخي د دې روزنیزې خپرونې په پرانیستلغونډه کې وویل: "اوسنۍ خپرونه به د صادراتو د ودې، د سوداګریزو پالیسیو د جوړښت، د نړیوالې سوداګرۍ مرکز تړونونو او د پانګونې او ترانزیت اړوندو برخو کې د سوداګرۍ او صنایعو وزارت د کارکوونکو د پوهې کچه لا اوچته کړي."

همداراز د هند جمهوریت د سوداګرۍ وزارت مرستیالې مېرمن ریتا تویتیا د افغانستان دولت د کارکوونکو د ظرفیت د لوړولو اړوند خپرونې څخه د هند هر اړخیزه ملاتړ څرګند کړ او زیاته یې کړه: "موږ د افغانستان د سوداګرۍ او صنایعو وزارت په علاقمندۍ سره د افغانستان دولت کارکوونکو د ظرفیتونو د لوړولو په اړوند خپرونه کار کوو تر څو وتوانېږو د افغانستان د اقتصادي ودې په برخه کې مرسته وکولی شو."

د نړیوالې سوداګرۍ په برخه کې د افغانستان د دولتي کارکوونکو د ظرفیت لوړولو پروژه د  4.5 میلیونه یرو په ارزښت ده د دریو کلونو لپاره پلان شوې ده چې د هند د بهرنۍ سوداګرۍ مطالعاتو مرکز له لوري به د افغانستان د سوداګرۍ او صنایعو وزارت په مرسته پلې شي.

 

په نوي ډیلي کې د افغانستان اسلامي جمهوریت مرستیال او سرپرست محمد میرویس بلخي د روان کال د اکتوبر میاشتې په ۹ مه نېټه په نوي ډیلي کې د مېشتو افغانانو د انسجام کمېټې له غړو سره افغان پناه غوښتنونکو ته د نویو پاسپورټونو د ورکولو د اړوند میکانیزم په اړه د خبرو اترو په موخه وکتل.

ښاغلي بلخي په دې ناسته کې د مهاجرینو په چارو کې د ملګرو ملتونو کمیسیون د مشرې سره د خپلې ناستې په اړه چې تېره اونۍ له قلمي پاسپورټونو څخه الکترونیکي پاسپورټونو ته د بدلېدو په اړه وو، خبرې وکړې او د افغان مهاجرینو ستونزو ته د حل لاري په اړه یې اندونه شریک کړل.

ښاغلي بلخي په راتلونکې میاشت کې د قلمي پاسپورټونو د وخت ختمېدو ته په اشارې سره د افغان مهاجرینو د انسجام له کمېټې څخه وغوښتل تر څو په ټول هند کې مهاجرینو ته خبر ورکړي تر څو د نومبر تر میاشتې پورې د نویو پاسپورټونو په اخیستلو کې جدي اقدام وکړي.

د یادونې وړ ده چې اوس مهال دولس زرو افغانان په هند کې د مهاجرینو په چارو کې د ملګرو ملتونو له کمیسیون سره ثبت دي.

په نوي ډیلي کې د افغانستان اسلامي جمهوریت شارژدافیر میرویس بلخي د روان کال د اکتوبر په اومه نېټه د تیلګو فلمونو ډایرکټر او سینماګر او همداراز د فلم نړیوال فستیوال عمومي مدیر وی. وي. مهیشور راو سره په خپل کاري دفتر کې وکتل.

د افغانستان سفارت شارژدافیر د دواړو هېوادونو د تاریخي او فرهنګي مشترکاتو په اړه خبرې وکړې او زیاته یې کړه: "نن ورځ د افغانستان خلک سربېره پر بالیوډ، د تلیګو، تامیل او کنادا سینما سره هم اشنايي لري."

میرویس بلخي د هند سینما او هنر په پیاوړي کولو او غنامندۍ کې د تیلګو او په ټولیزه توګه د هند سویلي سیمې سینما ونډه له ارزښته ډکه وبلله او له هغوی څخه یې د افغانستان هنر او سینما په برخه کې د همکاریو غوښتنه وکړه.

په دې ناسته کې هندي سینماګر ژمنه وکړه تر څو لنډ افغاني فلمونه د هندي فلمونو په هغو فستیوالونو کې نندارې ته کېږدي چې د روان کال د نوامبر له میاشتې څخه تر دسمبر میاشتې پورې په حیدرآباد، ممبۍ، بنګلور او جیپور ښارونو کې ترسره کېږي.

د یادونې وړ ده چې ښاغلي راو همداراز په کابل او نورو ښارونو کې د هند-افغانستان ګډو فلمي فسټیوالونو د جوړولو په اړه لېوالتیا څرګنده کړه او په دې برخه کې یې د افغان فلم او د فلمونو خصوصي کمپنیو د همکارۍ غوښتنه وکړه.

په نوي ډيلي کې د افغانستان اسلامي جمهوریت لوی سفارت اقتصادي مستشار احمد شعیب حبیبی د هند د سوداګرۍ او صنایعو خونو (FICCI) له مشر ګاتم ګاش او د دې بنسټ مرستیال سورب میتل سره د روان کال د اکتوبر میاشتې په ۵ مه نېټه د هند تولیداتو نندارتون د جوړولو په اړه د خبرو اترو په موخه وکتل.

دا دری ورځنی نندارتون به چې د روان کال د نومبر په ۱۵-۱۷ نېټو په نظر کې نیول شوی د FICCI، د هند د صنایعو او سوداګرۍ خونو وزارت، په افغانستان کې د هند سفارت او د افغانستان د سوداګرۍ او صنایعو خونو (ACCI) لوري په نوي ډیلي کې د افغانستان سفارت په همکارۍ سره جوړ شي.

د دې نندارتون موخه د هندي او افغاني سوداګرو لپاره د پانګونې فرصتونونو برابرولو دي تر څو د دواړو ملګرو هېوادونو ترمینځ اقتصادي اړیکې لاپیاوړې شي.

دا نندارتون به د ۵۰ هندي کمپنیو او سوداګرو د ګډون شاهد وي او د افغانستان او هند ترمینځ به د سوداګرۍ اړوند فرصتونه زیات کړي.

د یادونې وړ ده چې د نوموړي نندارتون لومړی دور د ۲۰۱۴ کال د نوامبر په ۲-۳ نېټو جوړ شوی وو چې پکې د دواړو هېوادونو ۵۰ سوداګریزو کمپنیو ګډون کړی وو.